1- އަބްދުﷲ ޚަލީލައި އޮތް ގުޅުން ކަނޑާލަން ޖެހުނު މައިގަނޑު ސަބަބަކީ ކޮބައިތޯ؟

2014 ވަނަ އަހަރު އޮތް ރައްޔިތުންގެ މަޖިލީހުގެ އިންތިހާބުގައި "ލޮލުން ބޮލުން" އަޅުގަނޑު އަބްދުﷲ ޚަލީލްއަށް ތާއީދު ކުރީ، ކިޔަވައިގެން ހުރި ރަނގަޅު މީހެއް ކަމަށް ގަބޫލު ކުރެވި، ޢަބްދުﷲ ޚަލީލްގެ ފަރާތުން ގައުމަށް ރަނގަޅު ކަންތައްތަކެއް ހާސިލްވާނެ ކަމުގެ އުއްމީދުގައެވެ. އެކަމަކު އަބްދުﷲ ޚަލީލްގެ ކިބައިން ފެނުނީ އުއްމީދު ކުރި ކަހަލަ ސިފަތަކެއް ނޫންކަމުން އަޅުގަނޑު އަބްދުﷲ ޚަލީލްއާ ދުރުވެއްޖައީމެވެ. ވަރަށް ގިނަ ސަބަބުތައް އެބަހުއްޓެވެ. ފާހަގަކޮށްލެވޭ ބައެއް ކަންކަން ހިއްސާކުރާނަމެވެ.

އެންމެ ފުރަތަމަ ޢަބްދުﷲ ޚަލީލްއާ އަޅުގަނޑުގެ ދެބަސްވާން ޖެހުނު ކަމަކީ، ކުރީގެ އުއްމަތަ ފަނޑިޔާރު އަހްމަދު ފާއިޒް ޙުސެއިން އަދި މިހާރުގެ އުއްތަމަ ފަނޑިޔާރު އަހްމަދު މުއުތަސިމް އަދުނާން، މަގާމުން ވަކިކުރުމަށް ރައްޔިތުންގެ މަޖިލީހުގައި ނެގި ވޯޓުގައި އަބްދުﷲ ޚަލީލް މި ދެންނެވި ދެ ފަނޑިޔާރުން މަގާމުން ވަކިކުރަން ވޯޓު ދިން ދިނުމެވެ. އެއީ ހަނދާންވާ ގޮތުން 2014 ވަނަ އަހަރުގެ ޑިސެމްބަރު މަހެއެވެ.

އޭގެ ފަހުން، ރާއްޖޭގެ ބިން ބޭރުގެ މީހުންނަށް މިލްކު ކުރެވޭ ގޮތަށް ގާނޫނު އަސާސީއަށް ގެނައި އިސްލާހުތަކަށް ތާއީދު ކުރިކުރުމަށް ވޯޓު ދިން ދިނުމަކީވެސް އަޅުގަނޑަށް ގަބޫލު ކުރެވޭ ކަމަކަށް ނުވިއެވެ.

ޝަރީއަތުގައި އޮތް މައްސަލައަކަށް އަބްދުﷲ ޚަލީލް ނުފޫޒު ފޯރުވި ފޯރުވުމަކީވެސް އަޅުގަނޑު އަބްދުﷲ ޚަލީލްއާ ގުޅުން ކަނޑާލި ސަބަބުތަކުގެ ތެރެއިން ސަބަބެކެވެ.

ކުވައިތު ފަންޑުން ލިބުނު ފައިސާއަށް އަބްދުﷲ ޚަލީލް ހިޔާނަތްތެރިވުމާއި، ގައުމާއި ރައްޔިތުންގެ ކަންކަމަށްވުރެ އަމިއްލަ މަސްލަހަތު އިސްކުރިކަމަށް އަޅުގަނޑަށް ގަބޫލު ކުރެވުނު ކަމީވެސް އަބްދުﷲ ޚަލީލްއާ ދުރުވާން ޖެހުނު ސަބަބެކެވެ. ފަހުން އައިސް މީޑީއާގައި އާއްމުވި ފްލެޓް ލިސްޓް ފަދަ ކަންކަން ހިނގިއިރު، އަޅުގަނޑު ހުރީ ހަމަ ރަނގަޅަށްވެސް އަބްދުﷲ ޚަލީލްއާ ދުރުގައެވެ.

2- ޚަލީލު ކޮށްފައިވާ އެވެސް ވައްކަމެއްގައި މަނިކުފާނު ބައިވެރިވެފައި ވާނެތޯ؟

ޢަބްދުﷲ ޚަލީލްކޮށްފައިވާ ރަނގަޅު ނޫން އެއްވެސް ކަމެއްގައި އަޅުގަނޑުގެ އެއްވެސް ބައިވެރިވުމެއް ނޯންނާނެއެވެ. ހަމަ ކުޑަވެސް ބައިވެރިވުމެއް ނޯންނާނެ ކަމަށް މި ދަންނަވަނީ ސާބިތު ކަމާ، ފަޚުރުވެރިކަމާއެކުއެވެ.

3- ނިލަންދޫ އެއާޕޯޓް އެޅުމަށްޓަކައި ޚަލީލް ވެލެއްވި ގުރުބާނީ އިނގިލައްވާތޯ؟

ނިލަންދޫ އެއާޕޯޓް އެޅުމަށް އަބްދުﷲ ޚަލީލް ކޮންމެވެސް ވަރަކަށް މަސައްކަތް ކުރިކަމަށް އަޅުގަނޑު ގަބޫލު ކުރަމެވެ. ދެ އަހަރެއްގެ ބަޖެޓުގައި އެއާޕޯޓް ޕްރޮޖެކްޓް ހިމެނިފައިވުން އެކަމުގެ ހެއްކަކަށް ފުދޭނެއެވެ. އެކަމަކު އެކަމުގައި "ގުރުބާނީއެއް" ވިޔެކޭ އަޅުގަނޑު ނުދަންނަވާނަމެވެ. އެކަމުގެ މަސައްކަތް ކުރަން ޖެހޭ ރަނގަޅު ވަގުތުގައި، ކުރަން ޖެހޭ މަސައްކަތް އިޚުލާސްތެރިކަމާއެކު ކުރެވުނު ނަމަ އެ ޕްރޮޖެކްޓް އޮންނާނީ އަޅުގަނޑު ގަބޫލު ކުރާ ގޮތުގައި މިހާރު ނިމިފައެވެ. ނުވަތަ ކުޑަމިނުން ނިމުމުގެ މަރުހަލާގައެވެ.

4- ކުވޭތުގެ ފަންޑާ ގުޅިލައްވައިގެ ތިދެކެވޭ ވާހަކައިގެ ހަގީގަތަކީ ކޮބާތޯ؟ ކިހައި ލާރިއެއް އެ ފަންޑުން ދިންތޯ؟ އެލާރި ބޭނުން ކުރެވުނު ގޮތަކީ ކޮބައިތޯ؟ އެކަން ކަމުގެ އެއްވެސް ހެއްކެއް އެބަ އޮތްތޯ؟

ކުވޭތު ފަންޑާ ގުޅޭ ގޮތުން އަޅުގަނޑު އަބަދުވެސް މި ދައްކާ ވާހަކައަކީ، އެ ފަންޑުން ލިބުނު ފައިސާ ޢަބްދުﷲ ޚަލީލް "މިސް ޔޫސް" ކުރި ވާހަކައެވެ. މިކަން އަޅުގަނޑަށް ފާހަގަ ކުރެވުމުން އެންމެ ފުރަތަމަވެސް ޢަބްދުﷲ ޚަލީލްއާ އެ ސުވާލު ކުރީމެވެ. "ބޭބެ، އޭކޭ ފައުންޑޭޝަނަށް ކުވައިތު ފަންޑުން ލިބުނު ލާރި، ބޭބެގެ އަމިއްލަ އެކައުންޓަށް ޓްރާންސްފަރ ކުރިންތަ؟" 15 ސެޕްޓެމްބަރު 2018 ގައި އަބްދުﷲ ޚަލީލްއާ ސުވާލު ކުރީމެވެ. އެ ސުވާލަކަށް އަބްދުﷲ ޚަލީލް ޖަވާބެއް ނުދެއްވައެވެ. އެކަމަކު އެއީ ކީއްވެގެން އައި ސުވާލެއްތޯ އަދި އެއީ ކޮންބަޔަކު ފަތުރާ ވާހަކައެއްކަން އެނގޭ ކަމަށް ވިދާޅުވިއެވެ. އެ ކޮންވަޒޭޝަން އަޅުގަނޑުގެ ފޯނުގައި މިހާރުވެސް އެބައޮތެވެ.

ކުވައިތު ފަންޑުން އޭކޭ ފައުންޑޭޝަނަށްއެ 200،000 ޑޮލަރު ދިނެވެ. އެ ފައިސާއިން ރަށު ސްކޫލުގައި އަޅަން ފެށި އިމާރާތަށް ކޮންމެވެސް މިންވަރަކަށް ބޭނުން ކުރެވުނެވެ. އެ ލާރިން ޢަބްދުﷲ ޚަލީލްގެ ކޮއްކޮއެއްގެ "ޓިއުޝަން ފީ" ވެސް ދެއްކިއެވެ. އެ ފައިސާއިން ނިލަންދޫގައި ކުޑަކުދިންގެ ޕާކެއް އެޅުމަށްވެސް ހަރަދު ކުރިއެވެ. އަދި އެކި ފަހަރު މަތިން ޢަބްދުﷲ ޚަލީލްގެ އަމިއްލަ ބޭންކް އެކައުންޓަށް އެ ފައިސާ ޖަމާކުރިއެވެ. އަދި ރައްޔިތުންގެ މަޖިލީހުގެ ކުރީގެ މެންބަރެއްގެ އެކައުންޓަށްވެސް އެ ފަންޑުން ލިބުނު ފައިސާ ޖަމާކޮށްފައިވެއެވެ. އަމިއްލަ އެކައުންޓަށް އަބްދުﷲ ޚަލީލް ޖަމާކުރި ފައިސާއާއި، އަދި މި ދެންނެވި މެންބަރުގެ އެކައުންޓަށް ޖަމާކުރި ފައިސާއިން ކުރި ކަމެއް އަޅުގަނޑަކަށް ނޭގެއެވެ. އެކަމަކު މި ދެންނެވި ކަންކަމުގެ ކިތާބީ ހެކި އެބަހުއްޓެވެ. އަޅުގަނޑު އަތުގައި އެ މައުލޫމާތު ހުންނާނެކަން ޢަބްދުﷲ ޚަލީލްއަށްވެސް އެނގޭނެއެވެ.

5- ސަޑޭ މައްސަލައިގައި އެމަނިކުފާނު އެއްވެސް ނުފޫޒްއެށް ފަނޑިޔާރުންނަށް ފޯރުވިކަން އެނގިލައްވައިތޯ؟

ސަޑޭ މައްސަލައިގައި އެ މަނިކުފާނު ފަނޑިޔާރުންނަށް ނުފޫޒު ފޯރުވިކަމަށް ހިތުގެ އަޑިން ގަބޫލް ކުރަމެވެ.

6- އެއާޕޯޓް އެޅުމާ ވަރަށް ބޮޑަށް ދެކޮޅުކަން ފާހަގަ ކޮށްލެވޭ. ކޮބައިތޯ ސަބަބަކީ؟ ރައްޔިތުންނައް އަންނަ ތަރައްޤީ ހުއްޓުވާލުންތޯ މަޤުޞަދަކީ؟

އެއާޕޯޓް އެޅުމާ ހަގީގަތުގައި އަޅުގަނޑު ދެކޮޅެއް ނޫނެވެ. އެކަމަކު، މަގޫދޫ އެއަޕޯޓް ހުއްޓުވާފައި މިހާރު ދެން އަލުން ނިލަންދޫގައި އެއާޕޯޓް އަޅާކަށް އަޅުގަނޑު ބޭނުމެއް ނޫނެވެ. މިއީ އަޅުގަނޑުގެ ފަރުދީ ޚިޔާލެވެ. އެކަމުގެ ސަބަބުތައް އަޅުގަނޑުގެ ވެބްސައިޓް ameenfaisal.com ގައި ވަރަށް ތަފްސީލްކޮށް ލިޔެފައިވާނެއެވެ.

ރައްޔިތުންނައް އަންނަ ތަރައްޤީ ހުއްޓުވާލުމުގެ އެއްވެސް ނިޔަތެއް ނެތެވެ. އަދި އެކަހަލަ ކަމެއްވެސް ނުވެސް ކުރާނަމެވެ. އެކަމަކު ތަރައްގީގެ ނަމުގައި ރައްޔިތުންގެ ބޮލަށް "ޗިޕް ޖެހުމާ" އަޅުގަނޑު އަބަދުވެސް ދެކޮޅެވެ. އަދި އެކަމާ ދެކޮޅަށް އަބަދުވެސް ވަކާލާތު ކުރާނަމެވެ. އެކަމާ ދެކޮޅަށް ވަކާލާތު ކުރާނީ ފެކްޓާއާއެކު ގާނޫނީ އިމުގެ ތެރެއިންނެވެ. ތޯތޯ ވާހަކައެއް، ނޫނީ އަޅުގަނޑަށް ނޭނގޭ ވާހަކައެއް ނުދައްކާނަމެވެ. ނޭނގޭނަމަ އެނގޭ މީހުން ކައިރީ އަހައި އޮޅުން ފިލުވާނަމެވެ.

7- މަޖިލީހަށް ކުރިމަތި ތިލެއްވީ ކޮބައިތޯ ކޮލިފިކޭޝަން އަކީ ނުވަތަ މަނިކުފާނުގެ ކިބައިގައި ހުރި ލަޔާގަތާ ގާބިލުކަމަކީ؟

ރާއްޖެއާއި ރާއްޖޭން ބޭރުން ނޫސްވެރިކަމުގެ ދާއިރާއިން ކިޔެވީމެވެ. ތައުލީމީ ސެޓްފިކެޓްތަކަށް ބަލާނަމަ، އެޑްވާންސް ސެޓްފިކެޓް އިން ޖާރނަލިޒަމް، ޑިޕްލޮމާއިން ޖަރނަލިޒް، މަލްޓިމީޑިއާ ބެޗިލަރސް ޑިގްރީ އަޅުގަނޑު އަތުގައި އެބައޮތެވެ. އިންޑިޔާގެ ޗެންނާއީގައި ހުންނަ އޭޝިއަން ކޮލެޖް އޮފް ޖަރނަލިޒަމް އިންނާއި، ދިވެހިރާއްޖޭގެ ގައުމީ ޔުނިވަރސިޓީން އަދި އެމްއައި ކޮލެޖުން އަޅުގަނޑު ކިޔެވީމެވެ. އަދި މީގެ އިތުރުން ނޫސްވެރިކަމުގެ ދާއިރާއިން އިސްލާމިކް ޔުނިވަރސިޓީގެ މާސްޓަރސް ޑިގްރީ ކޯހުން ޖާގަ ލިބިފައި އެބައޮތެވެ.

ތަޖުރިބާއަށް ބަލާކަމުގައިވާނަމަ، ދިވެހިރާއްޖޭގެ ހައިކޯޓުގައި މަސައްކަތް ކުރާތާ މިހާރު މިއީ 13 ވަނަ އަހަރެވެ. ނޫސްވެރިކަމުގެ ދާއިރާގައި މަސައްކަތް ކުރާތީ މިއީ 20 ވަނަ އަހަރެވެ. ކުޅިވަރު ހިންގުމުގެ ތެރޭގައި މަސައްކަތް ކުރާތާ 10 ވަނަ އަހަރެވެ. ދިވެހިރާއްޖޭގެ އެންމެ ފުރަތަމަ ޕްރައިވެޓް ރޭޑިއޯ ސްޓޭޝަންގައި އަދި ފުރަތަމަ ޓީވީ ސްޓޭޝަންގައި މަސައްކަތް ކުރީމެވެ. ސްރީލަންކާގެ ޓީއެންއެލް ރޭޑިއޯ ކިޔާ ޕްރައިވެޓް ރޭޑިއޯއެއްގައިވެސް ތަޖުރިބާ ހޯދުމުގެ ޕްރޮގްރާމެއްގައި މަސައްކަތް ކުރީމެވެ.

ރާއްޖޭގެ އެންމެ ބޮޑު ކްލަބު، ނިއުރޭޑިއަންޓް ސްޕޯޓްސް ކްލަބުގެ މެނޭޖަރުގެ ގޮތުގައި މަސައްކަތްކޮށް ދިވެހި ލީގު ކާމިޔާބު ކުރީމެވެ. އޭއެފްސީ ކަޕުގައި ހޮންގްކޮންގް، ފިލިޕީންސް އަދި ސިންގަޕޫރުގައި ނިއުރޭޑިއަންޓްގެ މެނޭޖަރުގެ ގޮތުގައި މަސައްކަތް ކުރީމެވެ. އަދި މިޔަންމާ، ލާއޯސްގައި ނިއުރޭޑިއަންޓްގެ މީޑީއާ އޮފިސަރުގެ ގޮތުގައި މަސައްކަތް ކުރީމެވެ.

2007 ވަނަ އަހަރުން ފެށިގެން ބައިނަލް އަގްވާމީ ވަރަށް ގިނަ ކުޅިވަރު މުބާރާތްތައް ނޫސްވެރިއެއްގެ ގޮތުގައި ކަވަރު ކުރީމެވެ. ރާއްޖޭން ބޭރުގައި 12 ގައުމެއްގައި އޮތް އެކި ފެންވަރުގެ ކުޅިވަރު ހަރަކާތްތަކުގައި ނޫސްވެރިއެއްގެ ގޮތުން އެކި ފަހަރު ބައިވެރިވީމެވެ. މޯލްޑިވްސޮކަރގެ ނަމުގައި އިގިރޭސި ބަހުން ނެރުނު އޮންލައިން ފުޓްބޯޅަ ނޫހެއް ހިންގުމުގައިވެސް ވަރަށް ދުވަހު މަސައްކަތް ކުރީމެވެ.

ދިވެހިރާއްޖެ ޑިމޮކްރެސީއަށް ކުރި ދަތުރުގައި އަޅުގަނޑުގެ އެންމެ ޒުވާން ދުވަހުން ފެށިގެން މިއަދާ ހަމައަށް ވަރަށް ގިނަ ކަންކަން ތަޖުރިބާ ކޮށްފީމެވެ. މި ތަޖުރިބާތަކަކީ މަޖިލީހުގެ މެންބަރެއްގެ ގޮތުގައި ބޭނުން ހިފިދާނެ ތަޖުރިބާތަކެއް ކަމުގައި ދެކެމެވެ. އަދި އެއީ އަޅުގަނޑުގެ ހުރި ލަޔާގަތާއި ގާބިލުކަން ކަމުގައި ގަބޫލު ކުރަމެވެ. އަޅުގަނޑަށް ފުރުސަތު ދެއްވައިފިނަމަ މީގެ ކުރިން ނިލަންދޫ ދާއިރާގެ މެންބަރަކު ދުވަހަކުވެސް ޕަރފޯމް ނުކުރާ މިންވަރަށް އިރާދަ ކުރެއްވިއްޔާ އަޅުގަނޑު ޕަރފޯމް ކުރާނަމެވެ.

8- އާއިލާގެ އެންމެ އިސްބޭފުޅަކީ ޖަލީދޮންބެ ކަމަށް ޖިނަ ބަޔަކު ދެކޭއިރު ތިއިން އެއްވެސް ކަމަކައި ޖަލީލް ދޮންބެ އައި ބައްދަލު ކޮށް މަޝްވަރާ ކޮށްލިންތޯ؟

ރައްޔިތުންގެ މަޖިލީހަށް ކުރިމަތިލާން ގަސްތުކުރާ ވާހަކަ ޖަލީލް ދޮންބެއާ މަޝްވަރާ ކުރީމެވެ.

9- މަޖިލީހުގެ ގޮނޑިއަށް ވާދަ ކުރައްވާ ކެންޑިޑޭޓު އަޙްމަދު ރަޝީދައި އެވެސް ވަރަކަށް ބައްދަލު ކުރައްވައި އެއްވެސް މަޝްވަރާއެއް ކުރެއްވިފައިވޭތޯ؟

މަނިކުފާނުގެ ނަން ނަގައި ފަހަތަށް ޖެހެން ޖެހޭނެ އެއްވެސް ހާލަތެއް އަތުވެދާނެތޯ؟

އަހްމަދު ރަޝީދުއާ ދެ ފަހަރު ބައްދަލުކޮށް ވާހަކަ ދެއްކީމެވެ. ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ވާދަނުކޮށް އަޅުގަނޑު ފަހަތަށް ޖެހެން ޖެހޭނެ ހާލަތަކީ އަޅުގަނޑަށްވުރެ ރަނގަޅަށް މަޖިލީހުގައި ޕަރފޯމް ކުރެވޭނެ މީހަކު އެކަމަށް އިސް ނެގުމެވެ. އެ މީހާ ވާންޖެހޭނީ ތައުލީމާއި ތަޖުރިބާގެ ގޮތުން އަޅުގަނޑަށް ވުރެ ރަނގަޅު، މޮޅު މީހަކަށެވެ. އަހްމަދު ރަޝީދަކީ އެ މީހާއެއް ނޫނެވެ. އަދި ފާޠިމަތު ސައުދާއަކީވެސް އެ މީހާއެއް ނޫނެވެ.

10- ސިޔާސީ ގޮތުން ނިލަންދޫ ރައްޔިތުންނައް ދޭން އޮތް ނަސޭހަތާކީ ކޮބައިތޯ؟

އަޅުގަނޑުގެ ނަސޭހަތަކީ ކިޔަވައިގެން ތިބި ގާބިލު މީހުންނަށް ފުރުސަތު ދޭށެވެ. ކަންކަން ރަނގަޅު ކުރެވޭނީ ރަނގަޅު މީހުންނާ ކަންކަން ހަވާލުކޮށްގެނެވެ. މީހަކު ބުނާ ބުނުމެއްގެ މައްޗަށް ކަންކަން ނުނިންމައި، އަމިއްލައަށް ކަންކަމާމެދު ވިސްނައި ފިކުރުކުރާށެވެ. ހުޅުވާލެވިފައިވާ މި ޒަމާނުގައި ކަންކަމުގެ ހަގީގަތް އޮޅުން ފިލުވާލުމަކީ މާ އުނދަގޫ ކަމެއް ނޫނެވެ.

އަޅުގަނޑަށް ހޮޓް ސުވާލު ފައްޗެއް ކުރިމަތި ކުރީތީ ޝުކުރު ދަންނަވަމެވެ. ހަގީގަތުގައި ސުވާލުތައް އަޅުގަނޑު ހީކުރިހާ "ހޮޓެއް" ނޫނެވެ. އަޅުގަނޑަކީ އަބަދުވެސް ޖަވާބުދާރީ ވާނެ މީހެކެވެ. ތިޔަ ކުރައްވާ މަސައްކަތަށް އަދިވެސް އެއް ފަހަރު ޝުކުރު ދަންނަވަމެވެ. އަދި ތިޔަކަމުގައި އަޅުގަނޑުގެ އެހީތެރިކަމެއް ބޭނުންނަމަ އެކަމަށް ތައްޔާރަށް ހުރި ވާހަކަވެސް ދަންނަމަވެ.