މިއަދަކީ ނޫސްވެރިކަމުގެ މިނިވަން ކަމުގެ ދުވަހެވެ. ކޮންމެ އަހަރެއްގެވެސް މެއި މަހުގެ ތިންވަނަ ދުވަސް ފާހަގަ ކުރަނީ ނޫސްވެރިކަމުގެ މިނިވަންކަމުގެ ދުވަހުގެ ގޮތުގައެވެ.
ނޫސްވެރިކަމުގެ މިނިވަންކަމުގެ ދުވަސް މިއަދު ފާހަގަ ކުރެވޭއިރު، ސުވާލަކީ ނޫސްވެރިކަމުގެ މިނިވަންކަން ރާއްޖޭގައި އެބައޮތްތޯއެވެ؟ މިކަމުގައި އެކި މީހުން އެކި ގޮތަށް ދެކުމަކީ އެކަށީގެންވާ ކަމެކެވެ. ކޮންމެވެސް މިންވަރަކަށް ނޫސްވެރިކަމުގެ ތެރޭގައި ކުރިން އަޅުގަނޑަށްވެސް އުޅެވިފައި ހުރުމުން އަޅުގަނޑުގެ ޚިޔާލު ލިޔެލާނަމެވެ.
ނޫސްވެރިކަން ކުރާ ހިތުން އެކަމުގެ ތެރެއަށް އަޅުގަނޑު އެންމެ ފުރަތަމަ ނުކުތީ 2006 ވަނަ އަހަރު ދިވެހިރާއްޖޭގެ އަޑުގެ، އެސިސްޓެންޓް ޖަރނަލިސްޓެއްގެ ގޮތުގައެވެ. އެ ޒަމާނަކީ ދިވެހިރާއްޖޭގެ އަޑާއި ޓެލެވިޒަން މޯލްޑިވްސްގެ އިތުރުން ހަމަ އެކަނި އެންމެ ދެތިން ނޫސް ނުކުތް ދުވަސްވަރެވެ. މިހާރު މިއޮންނަ ބްރޭކިން ނިވްސްތަކާ ލައިވް އިވެންޓްތަކެއް ވަގުތުން ވަގުތުން ގެނެސްދިނުމެއް އޭރަކު ނޯވެއެވެ.
ދިވެހިރާއްޖޭގެ އަޑުގައި އުޅެނިކޮށް ލިބުނު ފުރުސަތެއްގައި ރާއްޖޭގެ ފުރަތަމަ ޕްރައިވެޓް ރޭޑިއޯ ސްޓޭޝަން- ދިއެފްއެމްގައި މަސައްކަތް ކުރުމުގެ ފުރުސަތެއް ލިބުނެވެ. އެއީ 2007 ވަނަ އަހަރުއެވެ. ދިއެފްއެމްގައި މަސައްކަތް ފެށި ދުވަސްކޮޅަކީ، ދިވެހިރާއްޖެ ޒަމާނީ ޑިމޮކްރެސީއަކަށް ބަދަލުވުމުގެ މަސައްކަތް ފެށިގެން އައި ދުވަސްވަރެވެ. މިނިވަންކަމާއި އެކު ހިންގާ، ހިންގޭނެ ރޭޑިއޯއެއްގެ ގޮތުގައި ދިއެފްއެމް އުފެދުމާއި އެކު އެ ސްޓޭޝަން ވެގެންދިޔައީ އާއްމުންގެ މެދުގައި ވަރަށް މަގުބޫލް ސްޓޭޝަނަކަށެވެ.
ހަނދާނުން ފިލުވައިލަން ދަތި އެތައް ހަދިސާތަކެއް ދިއެފްއެމްގައި އުޅުނު ދުވަސްވަރު ކަވަރު ކުރުމުގެ ފުރުސަތު ލިބުނެވެ. ސަލްޓަން ޕާކުގެ ބޮމުގެ ހާދިސާއާ، ހިމަންދޫ ހާދިސާއާ، ހޯރަފުށީގައި ރައީސް މައުމޫނަށް ވަޅިން ދޭން މަސައްކަތް ކުރި ހަމަލާއާ، މަސް މާރުކޭޓްގެ ވަޅަކަށް ވެއްޓި އެއް އާއިލާއެއްގެ ފަސް މީހުން ނިޔާވި ހިތާމަވެރި ހާދިސާއަކީ ހަނދާނުން ފޮހެ ނުލެވޭނެ ހާދިސާތަކެވެ. ގިނަ ޕާޓީ އެކުލެވޭ ގޮތަށް ފުރަތަމަ ބޭއްވުނު ރިޔާސީ އިންތިޚާބާ، މިހާރު މި އަމަލު ކުރެވެމުންދާ ގާނޫނު އަސާސީ ތަސްދީގު ކުރެވުމާ ގުޅުން ހުރި އެތައް ކަމެއް ކަވަރު ކުރަން ލިބުމަކީ ނޫސްވެރިކަމުގެ ކުރު ހަޔާތުގައި އަޅުގަނޑަށް ލިބުނު ތަޖުރިބާތަކެވެ.
ދިއެފްއެމްގައި މަސައްކަތް ކުރަނިކޮށް ރާއްޖޭން ބޭރުން ކިޔަވަން ލިބުނު ފުރުސަތެއްގައި އިންޑިޔާއަށް ދިޔައީމެވެ. އިންޑިޔާއިން އެނބުރި އައުމާއި ދިވެހިރާއްޖޭގެ ހައިކޯޓުގެ މީޑިއާ އޮފިސަރުގެ ވަޒީފާ ލިބުމުން މިއަދާ ހަމައަށްވެސް މި ހުރީ އެ ވަޒީފާގައެވެ.
ނޫސްވެރިކަމުގެ ކެރިއަރުން، ހައިކޯޓުގެ ވަޒީފާއަށް ބަދަލުވުމުގެ ކުރިން ވަރަށް ފުންކޮށް ވިސްނީމެވެ. ނޫސްވެރިކަން ދޫކޮށްލާފައި ހަމަ ހަގީގަތުގައިވެސް ދާނީތޯ ފުންކޮށް ވިސްނަން ޖެހުނީ ރާއްޖޭގައި އަޅުގަނޑަށް އޭރު ގަބޫލު ކުރެވުނު ގޮތުގައި މިނިވަންކަމާއި އެކު، ނޫސްވެރިކަން ކުރެވޭނެ މާހައުލެއް ނެތުމުންނެވެ. މިއަދުވެސް އަޅުގަނޑު ގަބޫލު ކުރަނީ އަބުރުވެރި ދިރިއުޅުމެއް އުޅެވޭނެ ފަދަ ކެރިއަރެއްގެ ގޮތުގައި ނޫސްވެރިކަން އަޅުގަނޑަށް ނުފެނެއެވެ. ލިބޭ އެއްޗަކާ ކުރަން ޖެހޭ މަސައްކަތެއް ދެކޮޅު ޖެހޭތަނެއް އަދި އަމުދުން އަޅުގަނޑަށް ނުފެނެއެވެ. އަޅުގަނޑުގެ މި ޚިޔާލާ ތިން ބޭފުޅަކު ކޮންމެހެން އެއްބަސްވާކަށް ނުޖެހެއެވެ.
ދެން އޮތީ ނޫސްވެރިކަމުގެ މިނިވަންކަމުގެ ވާހަކައެވެ. ހަގީގަތުގައި އަޅުގަނޑު ދެކޭ ގޮތުގައި ނޫސްވެރިކަމުގެ މިނިވަންކަން ރާއްޖޭގައި އޮތީ، އޮންނާން ޖެހޭ މިންވަރަށްވުރެވެސް މާ ފުޅާކޮށެވެ. ނޫސްވެރިކަން ރެގިއުލޭޓް ކުރެވޭތަނެއް ނުފެނެއެވެ. ގާނޫނު އަސާސީން ނޫސްވެރިކަން އަސާސީ ހައްގެއްގެ ގޮތުގައި ކަށަވަރުކޮށްދީފައިވަނީ ހައްދެއް ނެތި ކަމަށް އަޅުގަނޑު ގަބޫލެއް ނުކުރަމެވެ. މިއީ ވަރަށް ދިގުކޮށް ވާހަކަ ދެއްކި ދާނެ މައުލޫއެކެވެ. އެހެންނަމަވެސް މި ހިސާބުން ނިންމާލީއެވެ.
ނޫސްވެރިކަމުގެ މިނިވަން ކަމުގެ ދުވަހުގެ ތަހުނިޔާ، އެކުވެރި އެންމެހާ ނޫސްވެރިންނަށް އަރިސް ކުރަމެވެ.