ކުރީގެ ހަނދާންތަކަށް ބަލާއިރު، އީދު ދުވަހަކީ އަބަދުވެސް އިންތިޒާރު ކުރެވޭ އުފާވެރި ދުވަހެކެވެ. ރަށުގެ ސަގާފަތަށް ބަލާއިރު އީދު ދުވަހުގެ އެންމެ ހެދުނު އީދު ނަމާދުކޮށް ނިމިގެން ތިމާގެ ތިން ހަތަރު ގެއަށް ސައިބޯން ނުގޮސް ސަލާމަތެއް ނުވާނެއެވެ. ސަޔަށް ފަހު ދެން އޮންނާނީ ކުކުޅު ކަތިލުމެވެ.
ކުކުޅު ކަތިލުމުގެ އިވެންޓް ފެށޭނީ ކުކުޅު ހިފަން ދުއްވައިގަންނަ ހިސާބުންނެވެ. އުމުރުން ދާދި އެއްވަރުގެ، ދެބެންގެ ދެދަރި ކުދިން ހިމެނޭ ގްރޫޕުން އީދު ދުވަހުގެ ހެނދުނު ސަޔަށް ފަހު ކުކުޅު ފަހައި ދުވެ ކުކުޅު ހިފައި ކަތިލުން އޮންނާނެއެވެ. ފަހުން ފަހުން ކޮށީގައި ކުކުޅު ގެންގެޅެން ފެށުމާއެކު ކުކުޅު ފަހައި ދުވުމުގެ ކުޅިވަރު ނިމުނީއެވެ. އެކަމަކު ކުކުޅު ކަތިލައި، އަތިރި މަތީގައި ގަހެއްގައި އެލުވައިގެން ކުކުޅު ނޮޅުން ދާދި ފަހަކާ ޖެހެންދެންވެސް އޮތެވެ. ކުކުޅު ނޮޅައި ސާފުުރުމަށް ފަހު ބަދިގެއާ ހަވާލު ކުރުމުން ކުކުޅު ހިފާ ގްރޫޕުގެ މަސައްކަތް ނިމުނީއެވެ. ދެން އޮންނާނީ މެންދުރު ނަމާދަށް ފަހު ކެއުމެވެ. އޭރު އީދު ކުޅިވަރުތަކުގެ ތެރޭގައި އޮންނަނީ މިހާރު މި އޮންނަހެން ފުޓްސަލްއާ ފެން ކުޅިއެއް ނޫނެވެ. މަންޑި ކުޅުމާ، އަދި އެ ނޫންވެސް ސަގާފީ ކުޅިވަރުތަކެވެ.
އެ ޒަމާން މިހާރު ފާއިތު ވެއްޖެއެވެ. މިހާރު އީދު ފާހަގަ ކުރުން މި އޮންނަ ގޮތަކީ ވަރަށްވެސް ފޫހި ގޮތެކެވެ. އީދެއްހެން ހީވެސް ނުވެއެވެ. ފައިމަގުގައި އުޅުމަކީ މާލޭގައި އަދި އަމުދުން މިހާރު ފަސޭހަ ކަމެއް ނޫނެވެ. އީދު ކުޅިވަރަކަށް އޮންނަ މިއުޒިކް ޝޯވްތަކާ އަދި ފުޓްސަލް މުބާރާތްތަކަކީ ހަގީގަތުގައި އީދާ ބީރައްޓެހި ކުޅިވަރުތަކެކެވެ.
އީދަކީ އެއް ބަޔަކު އަނެއް ބަޔަކާ ބައްދަލުވެ ސަލާމް ގަލާމް ކުރާ ދުވަހެވެ. ތިމާގެ މީހުންނާ ބައްދަލުވެ ހާލު އަހުވާލު އޮޅުން ފިލުވާ ދުވަހެކެވެ. ގާތްކަމާއި ލޯއްބާއި އަޅާލުމުގެ ދުވަހެކެވެ. މިއަދު އީދު ފާހަގަ ކުރާ ގޮތުން އީދު ދުވަސްހެން ހީވެސް ނުވެއެވެ.