ރައްޔިތުންގެ މަޖިލީހުގައި އަޅުގަނޑު ތަމްސީލް ކުރާ މެންބަރަކީ، ތެދުވެރި، އަމާނަތްތެރި، ކިޔަވައިގެން ހުރި ކަމަށް ގާބިލު މީހަކަށްވުމަކީ އަޅުގަނޑު އަބަދުވެސް ވަކާލާތު ކުރަމުން އަންނަ ކަމެކެވެ. އިސްލާމްދީނާއި ދިވެހި ގައުމަށް އަބަދުމެ ވަފާތެރި މީހަކު ނޫނީ، އެ މަގާމަށް ދިޔުމަށް އަޅުގަނޑެއް ދުވަހަކުވެސް ނޭދެމެވެ.
ހަވާލުކުރެވޭ ޒިންމާތައް ފުރިހަމައަށް އަދާ ކުރެވޭ ވަރުގެ މީހަކަށް ނޫނީ އަޅުގަނޑަކަށް ދުވަހަކުވެސް ތާއީދެއް ނުކުރެވޭނެއެވެ. މިއީ ހިތުގެ އަޑިން އަޅުގަނޑު އަބަދުވެސް ގަބޫލު ކުރާ، އަދި އަބަދުވެސް އަޅުގަނޑު އެ ގޮތެއްގެ މަތީގައި ސާބިތުކަމާއެކު ދެމި ހުންނާނެ ގޮތެވެ.
ކުރިއަށް މިއޮތް ރައްޔިތުންގެ މަޖިލީހުގައި އަޅުގަނޑު ތަމްސީލް ކުރާ މެންބަރަކީ މި ދެންނެވި ކަންކަން ފުރިހަމަވާ މީހަކަށްވޭތޯ އަޅުގަނޑު ވަރަށް މަސައްކަތް ކުރީމެވެ. އަޅުގަނޑުގެ އުފަން ދާއިރާގާއި މި ދެންނެވި ކަންކަން ފުރިހަމަވާ ކަމަށް އަޅުގަނޑަށް ގަބޫލު ކުރެވޭ ވަރަށް ބައިވަރު މީހުން އެބަތިއްބެއެވެ. އޭގެ ތެރެއިން ބައެއް މީހުންނާ އިންތިހާބާ ގުޅޭ ގޮތުން އަޅުގަނޑު މަޝްވަރާވެސް ކުރީމެވެ. ބައެއް މީހުން އެކަމަށް ޝައުގުވެރިވާކަން ހާމަކުރިއެވެ. ބައެއް މީހުން އެކަމަށް އެއްވެސް ޝައުގުވެރިކަމެއް ނެތް ކަމަށް ބުންޏެވެ. އަދި ބައެއް މީހުން އަޅުގަނޑަށް އެކަމުގައި ތާއީދު ކުރާނެކަން ހާމަކޮށް އެކަމުގައި ކުރިއަށް ދިޔުމަށް ހިތްވަރުވެސް ދިނެވެ.
އެކިއެކި މަޝްވަރާތަކަށް ފަހު، ރައްޔިތުންގެ މަޖިލީހުގެ އިންތިހާބުގައި ވާދަކުރަން އަޅުގަނޑު ނިޔަތްގަނެ، އެކަމަށް ތައްޔާރުވެސްވީމެވެ. އެކަމުގައި ކުރަން ޖެހޭ މަސައްކަތްތައް އެންމެ ފަހު ވަގުތާ ހަމައަށްވެސް ކުރީމެވެ. އަޅުގަނޑު ކުރިމަތިލާން ބޭނުން ނޫން ނަމަވެސް އަޅުގަނޑު ކުރިމަތިލައިފި ނަމަ ފުރިހަމައަށް ތާއީދު ކޮށްދޭނެ މީހުންނާއި، ހަމަ އެކަނި ވޯޓު ދޭނެ މީހުންނާވެސް ދިމާވިއެވެ. އަދި ދުވަހަކުވެސް ތާއީދު ނުކުރާނެ ކަމަށާއި ހޮވުނަ ނުދޭން ކުރެވުނުހާ މަސައްކަތެއް ކުރާނެ ކަމަށް ބުނި މީހުންނާވެސް ދިމާވިއެވެ.
އަޅުގަނޑަށް ހެޔޮ އެދޭ އިޚްލާސްތެރި ރައްޓެހިންނާއި އާއިލާގެ ލޯބިވާ ގިނަ މީހުން އެދުނީ މި ފަހަރު ފަހަތަށް ޖެހިލުމަށެވެ. އެކި މީހުންގެ ސަބަބުތައް ތަފާތެކެވެ. އެކަމަކު އެންމެންނަށްވެސް އިއްތިފާގުވެވޭ ކަމަކީ އެކަމުން ނުކުންނާނެ ނަތީޖާއެވެ.
އަޅުގަނޑު ރައްޔިތުންގެ މަޖިލީހަށް ކުރިމަތިލާން ގަސްތު ކުރީވެސް އަދި ކުރިމަތިނުލާން ނިންމީވެސް އެއްވެސް މީހެއްގެ އެއްވެސް ނުފޫޒަކުން ނޫނެވެ. މަޝްވަރާ ކުރި އެންމެންނާވެސް އެންމެ ފަހު ވަގުތުވެސް ކުރި މަޝްވަރާތަކަށް ފަހު ގޮތެއް ނިންމީ އަޅުގަނޑު އަމިއްލައަށެވެ. އޭގައި އާއިލީ ސަބަބުތަކާއި ޒާތީ ސަބަބުތަކާއި އަދި ސިޔާސީ ސަބަބުތައްވެސް ހިމެނެއެވެ.
އާއިލީ ސަބަބުތަކޭ މި ދެންނެވީ އަޅުގަނޑުގެ ނަން އޮންނަ ވޯޓު ކަރުދާހެއްގައި އެއްވެސް ސުވާލެއް ނެތި އަޅުގަނޑަށް ވޯޓު ދޭނެ އެތައް ބައިވަރު ބަޔަކު ތިބި ފަދައިން، އަޅުގަނޑުގެ ނަން އޮވެ، ހިތާ ދެކޮޅަށް އަޅުގަނޑު ނޫން އެހެން މީހަކަށް ވޯޓުލާން މަޖުބޫރުވެފައިވާ މީހުންވެސް ތިބި ވާހަކައެވެ. އަޅުގަނޑުގެ ނަން، ވޯޓު ކަރުދާހުގައި އޮވެ، އަޅުގަނޑު ނޫން މީހަކަށް ވޯޓުލާން ޖެހިއްޖެ ހާލަތުގައި އާއިލީ މައްސަލަތަކެއް އުފަންވާނެއެވެ. އެ ފަދަ ނުތަނަވަސްކަމެއް މެދުވެރިވާ މީހަކަށް އަޅުގަނޑު ވާކަށް ހަމަ ގައިމުވެސް މި ވަގުތަކު ނެތީމެވެ. އަޅުގަނޑު އަބަދުވެސް ގަބޫލުކުރަނީ އާއިލީ މަސްލަހަތަށްވުރެ ދިވެހި ގައުމު ބޮޑުވާނެ ކަމަށެވެ. އެކަމަކު އާއިލީ މަސްލަހަތަކީ އަބަދުވެސް މުހިއްމު ކަމެއްކަމުގައި ގަބޫލު ކުރުމަވެ. މުހިއްމުކަންކަން އަވަސް ކުރަން ޖެހޭ ފަހަރުތައް އަންނަ ފަދައިން މުހިއްމު ކަންކަން ފަސްކޮށްލަން ޖެހޭ ފަހަރުވެސް އާދެއެވެ.
މަޖިލީހުގެ އިންތިހާބުގައި ވާދަ ނުކުރަން ނިންމި ޒާތީ ސަބަބުތަކޭ މި ދެންނެވީ އަޅުގަނޑުގެ އަމިއްލަ ދިރިއުޅުމުގައި މުހިއްމު އެހެން ކަމަކާ އިންތިހާބުގެ ވަގުތާ އިއްތިފާގުން މި ފަހަރު ދިމާވި ދިމާވުމެވެ. އެކަމުގެ ތަފްސީލަށް މި ވަގުތު އަޅުގަނޑު ދާކަށް ނެތީމެވެ.
ސިޔާސީ ސަބަބުތައް ކަމަށް މި ދެންނެވީ، އަޅުގަނޑު އިންތިހާބުގައި ވާދަކުރުމުން ސިޔާސީ ގޮތުން އަޅުގަނޑަށް ވިސްނޭ، އަދި އަޅުގަނޑަށް ތާއީދު ކުރެވޭ ނަތީޖާ ނޫން އެހެން ނަތީޖާއެއް ނުކުތުމުގެ ފުރުސަތުތަކެއްވެސް އޮތީމައެވެ. ސިޔާސީ ކަންކަމުގައި ސިޔާސީ ނަޒަރުން ވިސްނައި، ސިޔާސީ ނިންމުން ނިންމަން ޖެހޭކަމަށް އަޅުގަނޑު ގަބޫލު ކުރަމެވެ.
އިންތިހާބުގައި ވާދަކުރުމާ ގުޅޭ ގޮތުން، ރާއްޖޭގެ ސިޔާސީ އިސް ދެ ލީޑަރަކާ އަޅުގަނޑު ބައްދަލުކޮށް މަޝްވަރާ ކުރީމެވެ. ދެ ލީޑަރުންވެސް އަޅުގަނޑަށް ނުހަނު ހެޔޮ ނަސޭހަތްތައް ދެއްވިއެވެ. އިންތިހާބާ ގުޅިގެން ފުރިހަމަ އެހީތެރިކަން ދެއްވާނެ ކަމަށް ދެ ލީޑަރުންވެސް ވިދާޅުވިއެވެ. އެ ދެ ބޭފުޅުންގެ އަރިހުންވެސް އަޅުގަނޑު އެދުނީ ހަމަ އެކަނި މޯރަލް ސަޕޯޓަކަށެވެ. އެކަމުގައި ފުރިހަމަ ސަޕޯޓް އަބަދުވެސް ލިބޭނެ ކަމުގެ ޔަގީންކަން ދެ ލީޑަރުންވެސް ދެއްވިއެވެ.
މި ދެންނެވި ދެ ލީޑަރުންނަކީވެސް މީގެ އެތައް ދުވަހެއް ކުރިއްސުރެވެސް އަޅުގަނޑު ދަންނަ، އަދި އަޅުގަނޑު ވަރަށް އިހުތިރާމް ކުރާ ދެ ލީޑަރުންނެވެ. ރާއްޖޭގެ ސިޔާސީ މަޝްރަހުގައި އެންމެ މަތީ އުޑުގައި ފިޔަޖަހާ ދެ ލީޑަރުންނެވެ. އަޅުގަނޑު އިންތިހާބުގައި ވާދަނުކުރަން ނިންމި ސިޔާސީ ސަބަބުތައް ދެ ލީޑަރުންނާވެސް އަޅުގަނޑު ހިއްސާ ކުރީމެވެ. އަޅުގަނޑަކީ ސިޔާސީ މާބޮޑު ތަޖުރިބާއެއް ހުރި މީހެއް ނޫނެވެ. އެކަމަކު އަޅުގަނޑު މި ދެންނެވި ސަބަބުތައް އައްސަވައި ދެ ލީޑަރުންވެސް އަޅުގަނޑުގެ ނިންމުން ރަނގަޅު ކަމުގައި ވިދާޅުވިއެވެ.
ކުރިމަތި ނުލާން ނިންމައި އަޅުގަނޑުގެ ނިންމުން އެންމެ ފުރަތަމަ ހިއްސާ ކުރީ އަޅުގަނޑުގެ އާއިލާގެ މެންބަރުންނާއެވެ. އެއަށް ފަހު، އަޅުގަނޑާއެކު މި ދަތުރުގައި ތިބި މީހުންނާ އަޅުގަނޑު، އަޅުގަނޑުގެ ނިންމުން ހިއްސާ ކުރީމެވެ. އަދި އެންމެ ފަހު ކަމަކަށް، ފޭސްބުކް މެދުވެރިކޮށް އަޅުގަނޑު އެކަން އާއްމުކޮށް އިއުލާން ކުރުމަށް ލިޔުނީމެވެ.
ލޯބިވާ މަންމަ، އާއިލާގެ އެންމެންނާ އަދި ހެޔޮ އެދޭ އެންމެ ގާތް ރައްޓެހިންނާ އަދި ވަކިން ޚާއްސަކޮށް އައްސޮބެއާއެކު އެކި ފަހަރު މަތިން، ވަރަށް ދިގުކޮށް ކުރެވުނު މަޝްވަރާތަކަށް ފަހު، މި ފަހަރު ރައްޔިތުންގެ މަޖިލީހުގެ އިންތިހާބުގައި ވާދަނުކުރަން ނިންމައިފިން. މި ވޭތިވެ ދިޔަ ދުވަސްތަކުގައި އަޅުގަނޑަށް މިކަމުގައި އެކިގޮތް ގޮތުން ސަޕޯޓްކޮށްދެއްވި، އާއިލީ މެންބަރުންނާއި އިޚްލާސްތެރި އެކުވެރިންނަށް ހިތުގެ ފުން މިނުން ޝުކުރު ދަންނަވަން. އަދި މި ވޭތިވެދިޔަތަނުގައި ދެކެވިފައިވާ ވާހަކަތަކުގައި ތިއިން ބޭފުޅެއްގެ ހިތުގައި ނުތަނަވަސްކަމެއް އުފެދިފައިވާނަމަ، އެކަމަށް ނިހާޔަތަށް މާފަށް އެދެން.
މަޖިލީސް އިންތިހާބުގައި ވާދަކުރަން އަޅުގަނޑު ގަސްތުކޮށް، އިދާރީ ގޮތުން އެކަމުގައި ކުރަން ޖެހޭ އެންމެހައި މަސައްކަތް އަޅުގަނޑު ކުރީމެވެ. އަމިއްލަ ގޮތުން އިންތިހާބުގައި ވާދަކުރުމަށް ބޭނުންވާ ސޮއި ހޯދުމުގެ މަސައްކަތް މާލޭގައި އަޅުގަނޑު އަމިއްލައަށް ކުރިއިރު، އަޅުގަނޑުގެ ވަރަށް ގާތް، ޒަމާންވީ އިޚްލާސްތެރި ރައްޓެއްސަކު ރަށުގައި އެ މަސައްކަތް ކޮށްދިނެވެ. އަދި އަޅުގަނޑު ދެކެ ވަރަށް ލޯބިވާ، އަދި އަޅުގަނޑުވެސް ވަރަށް ލޯބިވާ އަޅުގަނޑުގެ ދެބެންގެ ދެދަރި ކޮއްކޮއަކު އަޅުގަނޑަށް އެ މަސައްކަތުގައި ފުރިހަމައަށް އެހީތެރިވެދިނެވެ. މި ދެ ފަރާތަށް އަޅުގަނޑުގެ ހިތުގެ އިޚުލާސްތެރި ޝުކުރު ދަންނަވަމެވެ.
އަޅުގަނޑަށް ތާއީދުކޮށް އަޅުގަނޑަށް އެންޑޯސްކޮށްދެއްވައި، އިންތިހާބީ ފޯމްތަކުގައި ސޮއިކޮށްދެއްވި ހުރިހާ ފަރާތްތަކަށް ހިތުގެ އިޚުލާސްތެރި ޝުކުރު ދަންނަމަވެ. ތިއިން އެއްވެސް ބޭފުޅަކު މާޔޫސްކުރާނެ މީހަކަށް އަޅުގަނޑު ނުވާނަމެވެ. މި ދެންނެވި މީހުންގެ ތެރެއިން އެންމެ އިސް ބައެއް މީހުންނަށް އަޅުގަނޑުގެ ނިންމުން ހިއްސާ ކުރުމުން އެކަމުގައި އަޅުގަނޑު ނިންމި ނިންމުމަށް އިހުތިރާމްކޮށް، އަދި އެއީ މި ވަގުތަށް ވަރަށް ރަނގަޅު ނިންމުމެއް ކަމަށްވެސް ވިދާޅުވިއެވެ.
ތާރީހަށްޓަކައި މި ލިޔުން ލިޔެ މި ރައްކާކުރަނީ، އަޅުގަނޑު ނިންމި ނިންމުމާމެދު ފަހުރުވެރިވެ ހުރެއެވެ. މާތް ﷲ ވަކީލުކޮށް އަޅުގަނޑު އުއްމީދު ކުރަނީ އަޅުގަނޑުގެ ނިންމުމަކީ މި ވަގުތަށް އެންމެ ރަނގަޅު ނިންމުން ކަމަށްވާނެ ކަމަށެވެ. އަޅުގަނޑަކީ ތިޔަ ބޭފުޅުން މާޔޫސް ކުރާނެ މީހެއް ކަމުގައި ނުވާނަމެވެ.