ޝަރުއީ ދާއިރާގެ މަސައްކަތްތައް ފެށުމަށް ކޮންމެ އަހަރަކުވެސް ބާއްވަމުން އަންނަ 'ޤަޟާއީ ޖަލްސާ' އަކީ ޝަރުއީ ދާއިރާގެ ވަރަށް ގިނަ ބަޔަކު އެއްތާކުން ބައްދަލުވެ ސަލާންގަލާން ކުރާ ހަފްލާއެކެވެ.
މި ހަފްލާގައި ކޮންމެ އަހަރަކުވެސް އެންމެ މުހިއްމު އެއް އިވެންޓަކަށް އޮންނަނީ ރައީސުލް ޖުމްހޫރިއްޔާގެ ވާހަކަފުޅެވެ. އެކަމަކު 'ޤަޟާއީ އަހަރު 2024' ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ރޭ އިފްތިތާޙުކޮށްދެއްވިއިރު، އެ މަނިކުފާނު އެ ޖަލްސާގައި ވާހަކަފުޅު ނުދެއްކެވުމަކީ ޖަލްސާއަށް ލިބުނު އުނިކަމެކެވެ.
ޝަރުޢީ ދާއިރާގައި ގިނަ ދުވަސްތަކެއް ވަންދެން މަސައްކަތްކޮށްފައިވާ، އަދި މިހާރުވެސް ވަޒީފާގައި ހުރި މުވައްޒަފެއްގެ ހައިސިއްޔަތުން އަޅުގަނޑު އެކަމާ ނުހަނު ދެރަވިއެވެ. ވަކިން ހާއްސަކޮށް، އާ ރައީސްގެ ފުރަތަމަ ޤަޟާއީ ޖަލްސާކަމުން ހަމަ ގައިމުވެސް އަޅުގަނޑު އުއްމީދުކޮށްގެން ހުރީ އެ މަނިކުފާނު އެ ޖަލްސާގައި ވާހަކަފުޅު ދައްކަވާނެ ކަމަށެވެ.
ޖަލްސާގައި ރައީސް ވާހަކަފުޅު ނުދެއްކެވި ނަމަވެސް އެ މަނިކުފާނުވަނީ ޖަލްސާ ނިންމަވައިލެއްވުމަށް ފަހު ޖަލްސާއަށް ހާޒިރުވެ ތިއްބެވި "ޖުޑީޝަލް ފެމިލީ" ގެ މެންބަރުންނާ ވަކިވަކިން ވާހަކަފުޅު ދައްކަވައި ފޮޓޯ ނަންގަވާފައެވެ.
މިއީ، ޑރ. މުހައްމަދު މުއިއްޒު ރައީސްކަމާ ހަވާލުވެވަޑައިގެންނެވި ފަހުން އެ މަނިކުފާނާ އަޅުގަނޑާވެސް ބައްދަލުވީ ފުރަތަމަ ފަހަރެވެ. ސަލާމް ކޮށްލެއްވުމަށް ފަހު އަޅުގަނޑާ މުޚާތަބްކޮށް، ވަރަށް ގިނައިން ކުރިން ބައްދަލުވި ވާހަކަ ހިނިތުންވެ ހުރެ ވިދާޅުވިއެވެ. އެމަނިކުފާނު އެ އިޝާރާތް ކުރެއްވީ، ހައިކޯޓުގައި ހިނގަމުންދާ، ކުރީގެ ރައީސް އަބްދުﷲ ޔާމީން ޢަބްދުލްޤައްޔޫމްގެ ޝަރީއަތުގެ ސްޓޭޓަސް ބެއްލެވުމަށް އެ މަނިކުފާނު ވެރިކަމަށް ވަޑައިގެންނެވުމުގެ ކުރިން ނިކަން ގިނައިން ހައިކޯޓަށް ވަޑައިގެންނެވި ވާހަކަފުޅެވެ.
ޤަޟާއީ އަހަރު އިފްތިތާޙްކުރުމުގެ ރަސްމިއްޔާތު ބޭއްވުމުގެ އެންމެ މުހިންމު އެއް މަޤްޞަދަކީ، ފާއިތުވި އަހަރުގެ ތެރޭގައި ޝަރުޢީ ދާއިރާއިން ކަނޑައެޅި ލަނޑުދަނޑިތަކުގެ ތެރެއިން ހާސިލުވީ މިންވަރު ދެނެގަނެ ފެށޭ އަހަރަށް ލަނޑުދަނޑިތައް ކަނޑައެޅުމެވެ.
ރޭ އޮތް ރަސްމިއްޔާތުގައި ދިވެހިރާއްޖޭގެ އުއްތަމަ ފަނޑިޔާރު އޮނަރަބްލް އަލްއުސްތާޛު އަޙްމަދު މުޢުތަޞިމް ޢަދުނާނުވަނީ ފަނޑިޔާރުކަމުގައި ގިނަ ދުވަސްތަކެއް ހޭދަ ކުރެއްވުމަށް ފަހު ޝަރަފުވެރިކަމާއެކު ފަނޑިޔާރުކަމުގެ މަޤާމުން ވަކިވި ފަނޑިޔާރުން ތަކްރީމް ކުރައްވައި، ހަނދާނީ ފިލަޔާއި ރަމްޒީ މުގުރު އަރުވާފައެވެ.
ތަކްރީމް ކުރެއްވި ފަނޑިޔާރުންގެ ތެރޭގައި އަޅުގަނޑާއެކު ގިނަ ދުވަސްތަކެއް ވަންދެން ދިވެހިރާއްޖޭގެ ހައިކޯޓުގައި މަސައްކަތް ކުރެއްވި، ޖަސްޓިސް ރިޓަޔަޑް އަލްއުސްތާޛު ޔޫސުފް ޙުސައިން އަދި ޖަސްޓިސް ރިޓަޔަޑް އަލްއުސްތާޛު ޝުޢައިބު ޙުސައިން ޒަކަރިއްޔާ ހިމެނިވަޑައިގަންނަވައެވެ.
ޔޫސުފް ފަނޑިޔާރު، އަދި ޝުޢައިބު ފަނޑިޔާރަކީވެސް 2011 ވަނަ އަހަރު އަޅުގަނޑު ހައިކޯޓުގެ ވަޒީފާއަށް ވަންއިރުވެސް ހައިކޯޓުގެ ދެ ފަނޑިޔާރުންނެވެ. މީގެ ތެރެއިން ޔޫސުފް ފަނޑިޔާރު، ރިޓަޔަރ ކުރެއްވީ 2015 ވަނަ އަހަރުގެ ތެރޭގައެވެ. ޝުޢައިބު ފަނޑިޔާރު ރިޓަޔަރ ކުރެއްވީ، 2022 ވަނަ އަހަރުއެވެ.
ކުރިންވެސް ދެންނެވިހެން ޤަޟާއީ އަހަރުގެ އެންމެ ބޮޑު އުފަލަކީ މި ދެންނެވިހެން އަޅުގަނޑުމެން "ޖުޑީޝަލް ފެމިލީ" ގެ ގިނަ ބަޔަކު އެއްތާކުން ބައްދަލުވެ ސަލާންގަލާން ކޮށްލުމެވެ.
މި ލިޔުމުގައި އެވާ ފޮޓޯއަކީ، ޤަޟާއީ ޖަލްސާގެ ހަވާސާގައި ރައީސް ޑރ. މުޙައްމަދު މުޢިއްޒުގެ އިޒުނަޔާއެކު ނަގާފައިވާ ފޮޓޯއެވެ. މިއީ ޑރ. މުހައްމަދު މުޢިއްޒުއާއެކު އަޅުގަނޑު ނެގި އެންމެ ފުރަތަމަ ފޮޓޯއެވެ.