ދިވެހިރާއްޖެއަކީ ކޮވިޑުގެ ސަބަބުން އިގްތިސާދަށް އެންމެ ބޮޑު ލޮޅުމެއް އެރި އެއް ގައުމެވެ. ފުރަބަންދާއެކު ދިވެހިން ގޮތް ހުސްވިނަމަވެސް މާލީ ނިޒާމުން، ޚާއްސަކޮށް ބޭންކުން ލޯނުތައް 6 މަސް ދުވަހަށް ފަސްކޮށްދިނުމާއި ވަޒީފާ ގެއްލުނު ފަރާތްތަކަށް ދައުލަތުން އެހީވުމުން މިކަމުގެ އަސަރު ކޮންމެވެސް މިންވަރަކަށް ކުޑަވިއެވެ.
އެޗްޕީއޭގެ ހިސާބުތަކުން ދައްކާ ގޮތުގައި ދިވެހިރާއްޖޭން 83،500 އެއްހާ މީހުންނަށް ކޮވިޑު ޖެހުނެވެ. މިއީ ރާއްޖޭގެ އާބާދީގެ ނިސްބަތުން ވަރަށް މަތީ އަދަދެކެވެ. މީގެ ގާތްގަނޑަކަށް %70 އެއީ އުމުރުން 21 އަހަރާއި 60 އަހަރާ ދެމެދުގެ މީހުންނެވެ. މިއީ މަސައްކަތް ކުރާ އުމުރުފުރާއަށް ވެފައި، މީގެ ގާތްގަނޑަކަށް %54 ޕަސެންޓަކީ ފިރިހެނުންނެވެ. ރާއްޖޭގެ މަސައްކަތުގެ މައިދާނަކީ ނިސްބަތުން ފިރިހެނުން ގިނަ މައިދާނެކެވެ. މިކަން ދަލީލުކޮށްދޭ ޕެންޝަންގެ ހިސާބުތަކަށް ބަލާއިރު ފިރިހެނުންނަކީ މަސައްކަތުގެ އާބާދީގެ %65 އެވެ.
ރާއްޖޭގެ އިގްތިސާދު އެންމެ ބޮޑަށް ބިނާވެފައި އޮންނަނީ ފަތުރުވެރިކަމަށެވެ. 2019 ވަނަ އަހަރު ދިވެހިރާއްޖެއަށް 1.7 މިލިއަން ފަތުރުވެރިން އައި ނަމަވެސް، 2020 ވަނަ އަހަރު އެ އަދަދު ބައި މިލިއަނަށް ވެއްޓުނެވެ. ޓުވަރިޒަމް މިނިސްޓްރީގެ ރަސްމީ ހިސާބުތަކުން ދައްކާ ގޮތުގައި މިއީ %67 ގެ ދަށްވުމެކެވެ. ޓުވަރިޒަމަށް އައި ހީނަރުކަމާ ގުޅިގެން ރިސޯޓްތަކުގެ ކުލި ފަސްކުރަން ނިންމި ނިންމުމުން އާމްދަނީން 1 ބިލިއަނެއްހާ ރުފިޔާ މަދުވެގެން ދިޔުން ވެގެން ދިޔައީ ދިވެހި އިގްތިސާދަށް ކޮވިޑާ އެކު އައި، ކުރިން އަންދާޒާވެސް ކުރެވިފައިނުވާ ބޮޑު ވެއްޓުމަކަށެވެ.
ރާއްޖޭގެ ބޯޑަރު ބަންދު ކުރެވި، ފަތުރުވެރިކަމުގެ ހުރިހާ އޮޕަރޭޝަނެއް ހުއްޓި އޮތް ދުވަސްކޮޅަކަށް ފަހު، 2020 ވަނަ އަހަރުގެ މެދު ތެރޭ ފުރަތަމަ ފަހަރަށް ރާއްޖޭގެ ބޯޑަރު އަލުން ހުޅުވުނު ހިސާބުން އިގްތިސާދީ ހަރަކާތްތަށް ކޮންމެވެސް މިންވަރަކަށް ފެށުނެވެ. އަދި 2021 ވަނަ އަހަރުގެ ފަހު ކުއާޓާރގައި ރާއްޖެއަށް އައި ފަތުރުވެރިންގެ އަދަދު އިތުރުވެ، އަދި އޭނގެ ފަހުން ދުވަހެއް ދުވަހަކަށް ރާއްޖެ އަންނަ ފަތުރުވެރިންގެ އަދަދު މަޑު މަޑުން އަންނަނީ އިތުރުވަމުންނެވެ.
ކެޕިޓަލް މާކެޓް ޑިވެލޮޕްމެންޓް އޮތޯރިޓިގެ ޕެންޝަން ސުޕަރވިޝަން ޑިޕާޓްމެންޓްގެ ޑިރެކްޓަރ ޖެނެރަލް ޢަބްދުﷲ ޒަކަރިއްޔާ ވިދާޅުވި ގޮތުގައި ރާއްޖޭގެ އިގްތިސާދު މިހާރު އަނެއްކާވެސް ފެންނަނީ އުޖާލާކެވެ. އައިއެމްއެފްގެ ހިސާބުތަކާ ހަވާލާ ދެއްވާ ޢަބްދުﷲ ޒަކަރިއްޔާ ވިދާޅުވި ގޮތުގައި 2021 ވަނަ އަހަރު ރާއްޖޭގެ އިގްތިސާދުވަނީ ގާތްގަނޑަކަށް %31.6 ގެ ކުރިއެރުމެއް ހޯދާފައެވެ. މި އަހަރާއި އަންނަ އަހަރު ޑަބަލް ޑިގިޓުން ރާއްޖޭގެ އިގްތިސާދު ކުރިއަރާނެ ކަމަށް އައިއެމްއެފް، ވޯލްޑްބޭންކް އަދި އޭޝިއަން ޑިވެލޮޕްމެންޓް ބޭންކުންވެސް އަންދާޒާ ކުރާ ކަމަށް ޒަކަރިއްޔާ ވިދާޅުވިއެވެ.
2021 ވަނަ އަހަރު ރާއްޖެއަށް 1.3 މިލިއަން ފަތުރުވެރިން ޒިޔާރަތް ކުރިނަމަވެސް މި އަދަދަކީ 2019 ވަނަ އަހަރަށްވުރެ މަދު އަދަދެކެވެ. މާނައަކީ، ކޮވިޑުގެ ކުރިން އޮތް ހާލަތަށް އިގްތިސާދީ ގޮތުން ގައުމު ރުޖޫއަވާން އަދި ވަގުތު ބޭނުންވާނެކަމެވެ. އައިއެމްއެފުން ލަފާކުރާ ގޮތުގައި ފުލް ރިކަވަރީއަކަށްދާނީ 2024 ވަނަ އަހަރުގެ ފަހުކޮޅު ނުވަތަ 2025 ވަނަ އަހަރުގެ ކުރީކޮޅުއެވެ. އެކަމަކު އެއީ، އެ މުއްދަތުގެ ތެރޭގައި ވިސްނުންތެރިކަމާއި އެކު ކަންކަން ނިންމައިގެންނެވެ.