ރައީސުލް ޖުމްހޫރިއްޔާކަމުގެ ހުވައި ޑރ. މުހައްމަދު މުއިއްޒު މިއަދު ކުރައްވައިފިއެވެ. މުއިއްޒު އަކީ ރާއްޖޭގެ 8 ވަނަ ރައީސެވެ. އަދި އެމަނިކުފާނަކީ ރާއްޖޭގެ ދެ ވަނަ ޖުމްހޫރިއްޔާގެ 7 ވަނަ ރައީސެވެ.
ޑރ. މުހައްމަދު މުއިއްޒު ރާއްޖޭގެ ރައީސުލްޖުމްހޫރިއްޔާކަމުގެ ހުވައި ކުރެއްވުމަށް ފަހު، ދެއްވި ސްޕީޗަކީ ޔަގީނުންވެސް ރާއްޖޭގައި މަލްޓިޕާޓީ އިލެކްޝަނެއް ފުރަތަމަ ފަހަރަށް 2008 ވަނަ އަހަރު ބޭއްވުނު ފަހުން ސިޔާސީ ލީޑަރަކު ދެއްވި އެއްމެ ވަރުގަދަ ސްޕީޗުކަމާމެދު އަޅުގަނޑު ޝައްކެއް ނުކުރަމެވެ. އަޅުގަނޑު ކުރަމުން އަންނަ މަސައްކަތުގެ ގޮތުން، އަދި ސިޔާސީ ކަންކަމަށް ހުންނަ ޝައުގެއްގެ ބޮޑުކަމުން ސިޔާސީ ލީޑަރުންގެ ސްޕީޗުތައް ބަލައި ކޮންމެވެސް ވަރަކަށް ދިރާސާވެސް ކުރަމެވެ. ޑރ. މުއިއްޒު ދެއްވި ވަރުގެ ސާދާ، އަދި ވަރުގަދަ ސްޕީޗެއް އަޅުގަނޑު ގައިމުވެސް އަޑެއް ނާހަމެވެ.
މި ސްޕީޗުންވެސް އަޅުގަނޑަށް އެންމެ ބޮޑަށް އަޅައިގަތް ބަޔަކީ ސްޕީޗުގެ ފަހު ބައިގައި، ޑރ. މުއިއްޒުގެ ސަރުކާރުގެ ސޫރަޔާއި ސިފަ ވިދާޅުވެދެއްވި ބަޔެވެ. އެ ވާހަކަތައް އަޑު އަހަމުން ދިޔައިރު ގައިން ހީބިހި ނަގައިގެން ދިޔައެވެ.
"އަޅުގަނޑު ޢަދުލުވެރިވާނަން. ބޭއިންސާފެއް ނުވާނަން. ވައްކަމާއި ކޮރަޕްޝަނަށް ހަރުއަޑުން ނޫނެކޭ ބުނާނަން. މި އުފެދޭ އާ ސަރުކާރުގައި އެކަންކަމަށް ފިޔަވަޅުއަޅާނެ! ސަރުކާރުގެ ދެފުށް ފެންނާނެ. ފޮރުވައި ސިއްރުކުރުމެއް، ވަންހަނާކުރުމެއް ނޯންނާނެ. މާތް ﷲގެ ހެޔޮ ތައުފީޤާއެކު، އިރާދަކުރެއްވިއްޔާ، ވީ ވަޢުދު ފުއްދާނެ. ހީލަތްތެރިއެއް ނުވާނެ! އަޅުގަނޑުމެންގެ ސަރުކާރު، މާތްވެގެންވާ އިސްލާމްދީނާއި، ދިވެހި ޤައުމާއި، ފަސްގަނޑު ދިފާޢުކުރާނެ. ޣަދަރުވެރިއެއް ނުވާނެ!" ރައީސުލް ޖުމްހޫރިއްޔާ ޔަގީންކަމާއެކު ވިދާޅުވިއެވެ.
ކޮންމެއަކަށް އާވެރިކަމާއެކު، އާ އުއްމީދުތަކެއް ކުރެވޭނެ ކަމީ އިންސާނީ ތޮބީއަތެވެ. ޑރ. މުއިއްޒު މިއަދު އެ ދެއްވީ ވަރުގަދަ ޔަގީންކަމެކެވެ. އަޅުގަނޑުގެ އުއްމީދަކީ، ރައީސުލް ޖުމްހޫރިއްޔާ ޑރ. މުހައްމަދު މުއިއްޒުގެ މޭސްތިރިކަމުގައި ދިވެހި ގައުމަށް ފާގަތިކަމާ އަމާންކަމާއި އޮމާންކަމެވެ. ރައީސްގެ ސްޕީޗު ނިންމަވައިލައްވަމުން ވިދާޅުވިހެން، އޯގާވަންތަ ﷲ މި ފަޚުރުވެރި ދިވެހިރާއްޖެއަށް ހެޔޮ ގޮތްތައް މިންވަރު ކުރައްވާށިއެވެ. ދިވެހީންނަށް އަދަށްވުރެ ފަހި އުޖާލާ މާދަމާއެއް މިންވަރު ކުރައްވާށިއެވެ. އަދި މިއަދު މި ފެށި ޤައުމީ ދަތުރަކީ އަމާން، ކާމިޔާބު ދަތުރެއް ކަމުގައި ލައްވާށިއެވެ. މި ލޮބުވެތި ވަޠަން މިނިވަންކަންމަތީ އަބަދުމެ ލަހައްޓަވާށި! އާމީން!