މިހާރު އަމަލުކުރެވުމުންދާ ޤާނޫނުއަސާސީއަށް ޢަމަލުކުރަން ފެށިފަހުން މިހާރު 15 (ފަނަރަ) އަހަރުވެފައިވާއިރު، ޤާނޫނުއަސާސީއަށް ޢަމަލުކުރަން ފެށުމުން، ޤާނޫނުއަސާސީއާ ތަޢާރުޟުވާ ޤާނޫނު ނުވަތަ ޤާނޫނުގެ ބައި ފާހަގަކޮށް، އެއާ ގުޅިގެން ޤާނޫނުއަސާސީގައި ކަނޑައަޅާފައިވާ ޕްރޮސެސް ފަށާފައިވާކަމަށް މަތީ މަރުހަލާގެ ކޯޓެއްގައި އޮތް ޝަރީއަތެއްގައި ދައުލަތުގެ ބަންޑާރަ ނާއިބުގެ ފަރާތުން ވިދާޅުވިއެވެ.

ދައުލަތުގެ ބަންޑާރަ ނާއިބުގެ ފަރާތުން ކޯޓުގައި އެހެން ވިދާޅުވިނަމަވެސް އެ ޕްރޮސެސް ދައުލަތުން ފުރިހަމަކުރުމަށް އެކަށީގެންވާ ވަރަށް ވުރެ ގިނަ މުއްދަތެއް ފާއިތުވެފައިވާކަމީ ދެބަސްވެވޭނެކަމެއްނޫނެވެ. އަދި ހަމައެހާއެކު ޤާނޫނުއަސާސީގައި ހިމެނޭ އިންތިޤާލީ މަރުޙަލާއިން ޤާނޫނުއަސާސީގެ 299 ވަނަ މާއްދާގެ (ށ) ގެ 1 ވަނަ ނަންބަރުގައި ބަޔާންކުރާ މުއްދަތު ފާއިތުވެފައިވާކަމީވެސް ދެބަސްވެވޭނެކަމެއްނޫނެވެ.

ދަންނަވަން މިއުޅޭ ވާހަކައަކީ ރައްޔިތުންގެ މަޖިލީހުގެ މެންޑޭޓުގެ ތެރޭގައި ކުރަން ހުރި ލައްކަ މަސައްކަތް ޕެންޑިންގައި ހުރި ވާހަކައެވެ. ކަން މިހެން އޮތް އިރު، ޕާޓީތަކުގެ ސިޔާސީ ކޯޅުމުގައި މަޖިލީހުގެ ކޯރަމް ހަމަ ނުވެގެން މަޖިލީހުގެ ޖަލްސާ ކެންސަލްވުމަކީ އަޅުގަނޑު ހަމަ ހަގީގަތުގައިވެސް ކަންބޮޑުވާ ކަމެކެވެ. ދިވެހި ރައްޔިތުންގެ ޓެކްސް ފައިސާއިން ބޮޑު މުސާރަ ދޭ، 87 މެމްބަރުން މަޖިލީހުގައި ތިއްބަވާ އިރު ޖަލްސާއެއް ބޭއްވޭ ކޯރަމް ކަމަށްވާ އެންމެ 22 މެމްބަރުން ޖަލްސާގައި ނެތިގެން ޖަލްސާ ކެންސަލްވާއިރު އަދިވެސް ހަމަ ޕާޓީ ކޯޅުމަށް ފުރުސަތު ދޭނީތޯއެވެ؟