ދުބާއީގެ މިއުޒިއަމް އޮފް ފިއުޗަރ ހަމަ ލޮލުން ފެނުމުގެ ކުރިން ހީކުރީ އެއީ މާލޭގައި މި ދުއްވާ ބަސްތަކާ އެއް ސައިޒުގެ މޮނިއުމެންޓެއް ކަމަށެވެ. އެތަނާ ބެހޭ މައުލޫމާތެއް އެއްވެސް ވަރަކަށް ކުރިން ހޯދައި ނުބަލަމެވެ. އެހެން ހުއްޓާ ދުބާއީއަށް ދެވުމުން އެތަން ބަލައިލަން ދާ ހިތްވެއްޖެއެވެ. އެހެންނަމަވެސް އެތަނަށް ދެވުނު އިރު ތަންކޮޅެއް ލަސްވެފައި ހުރުމުން އެތެރެއަށް ވަދެވޭ ގޮތެއް ނުވިއެވެ. ދެން ޖެހުނީ ބޭރުން އެކަނި ބަލައިލާށެވެ. ފުރަން އޮތް ޝެޑިއުލްގެ ސަބަބުން އަލުން އެހެން ދުވަހަކުވެސް ގޮސް ބަލާލެވޭނެ ގޮތެއް ނުވިއެވެ. އެހެންކަމުން ހިތް ފުރެންދެން ބޭރުން ފޮޓޯ ނެގީމެވެ.
މިއުޒިއަމް އޮފް ފިއުޗަރ ހަމަ ލޮލުން ފެނުމުން އެއީ ބިޔަ ބޮޑު ފުރިހަމަ އިމާރާތެއްކަން އެނގުނެވެ. ރޭގަނޑު އެތައް ދިއްލާލާފައި ހުރިއިރު ކުރިން ހިތަށް ގެންނަންވެސް ނޭނގޭހާ އެތަން ފުރިހަމައެވެ. އެ ފުރިހަމަކަން ލިޔާނެ އިބާރާތްތަކެއް ހިތަކަށް ނުވަދެއެވެ.
މިދިޔަ އަހަރުގެ ކުރީކޮޅު ރަސްމީކޮށް ހުޅުވިގެންދިޔަ ދުބާއީގެ މިއުޒިއަމް އޮފް ފިއުޗަރ އަކީ ދުނިޔެ މީގެ ދުވަސްތަކެއް ފަހުން އޮންނާނެ ގޮތުގެ މިސާލެކެވެ. އުދުހޭ ކާރުތަކާއި، ވިންޑް ފާމްތަށް އަދި ސޯލާ އެނާޖީ ޕްރޮޖެޓްތަކުން ފުރިގެންވާ މިއުޒިއަމްއަކީ ހައިރާން ކުރެނިވިފަދަ ތަނެކެވެ.
މި އިމާރާތް އެއްކޮށް ނިންމާލީ ނުވަ އަހަރުން ކަމަށްވެއެވެ. އިމާރާތް ނިންމުމުގައި ރޮބަޓް ބޭނުން ކުރިކަމަށްވެސްވެއެވެ. ހަތް ބުރީގެ މުޅި އިމާރާތް ހިންގަނީ ސޯލާ އެނާޖީއިންނެވެ. އިމާރާތުގެ ބައްޓަމުން ފެށިގެން މީގެ ބޭރުގައި އަރަބި ކެލިގްރަފީއިން ލިޔެފައިވާ ލިއުންތަށްވެސް އެހާމެ ތަފާތެވެ. މި ކެލިގްރަފީތަކަކީ އިމާރާތުގެ ކުޑަދޮރުތަކެވެ. މިއީ ދުބާއީގެ ރޫލަރ، ޝޭހް މުހައްމަދު ބިން ރާޝިދް އަލް މަހްތޫމް ލިއުއްވާފައިވާ ޅެމެކެވެ.