އެއެފްސީ ކަޕުގައި ރާއްޖޭގެ ކްލަބު ހިމެނުނު ގްރޫޕް ޑީގެ މެޗުތައް ބަލާލުމަށް އިންޑިޔާގެ ކަލްކަތާއަށް ދިޔުމުގެ ފުރުސަތު މި އަހަރު ލިބުނެވެ. މި ސަރަހައްދުގެ އެންމެ ފެންވަރު ރަނގަޅު ސްޓޭޑިއަމްކަމުގައިވާ ކަލްކަތާގެ ސޯލްޓް ލޭކް ސްޓޭޑިއަމްގައި މެޗުތައް ބަލާލަން ލިބުމަކީ ލިބުނު ފާހަގަކޮށްލެވޭ ތަޖުރިބާއެކެވެ. އޭނގެ ތެރެއިންވެސް މި ކިޔައިދެނީ، ޔޫރަޕުގެ އެންމެ މަތީ ފެންވަރުގައި ކުޅެފައިވާ ކުޅުންތެރިއަކު ދިވެހި ފުޓްބޯޅައާ މެދު ދެކޭ ގޮތެވެ.

އެއީ ސަރަހައްދީ ގަދަބާރު އިންޑިޔާގެ އެއޭޓީކޭ މޯހަން ބަގާން އެފްސީ އަށް ކުޅޭ ފިންލެންޑް ގައުމީ ޓީމުގެ މިޑްފީލްޑަރު، ޖޯނީ ކައުކޯގެ ވާހަކައެވެ. މެޗު ނިންމާފައި ކޮންމެ ދުވަހަކުވެސް އޮންނަ ޕްރެސް ކޮންފަރެންސްގެ ތެރެއިން ޖޯނީއާ ސުވާލު ކުރުމުގެ ފުރުސަތު ލިބުމުން އޭނާ ކައިރިން އޮޅުން ފިލުވީ އެންމެ އެއްޗެކެވެ.

ޖޯނީވަނީ ޔޫރޯގައި ކުޅެފައި. ދުނިޔޭގެ އެންމެ މަތީ ފެންވަރުގައި ކުޅެފައި. މިއީ މުޅިން އެހެން ލެވެލްއެއް. މި ލެވެލްގައި ކުޅުނު މެޗުތަކުގައި ދިވެހި ޓީމުގެ ކުޅުންތެރިންގެ ފެންވަރާ މެދު ދެކެނީ ކިހިނެތް؟

"ކުޑަކުޑަ ގައުމެއް ރާއްޖެ އަކީ، އެކަމަކު، ހުނަރަށް ބަލާއިރު ވަރަށް މަތީގައި އެ ކުޅުންތެރިން ރޭޓްކުރަނީ. ޓެކްނިކަލީ ބަލާއިރު އެ ކުޅުންތެރިން ވަރަށް މޮޅު، ޓެކްޓިކަލް ޑިސިޕްލިން ހިފަހައްޓައިގެން ކުޅެން ވެސް އެނގޭ، އެކަމަކު، އަހަންނަކަށް ނޭނގޭ ރާއްޖޭގެ ލޯކަލް ފުޓްބޯޅައިގެ ގޮތެއް، ޔަގީނުން ވެސް އެ މީހުން ރަނގަޅުވާނީ ވަރުގަދަ މެޗުތަކެއް ކުޅެގެން" ޖޯނީ ބުންޏެވެ.

ފިންލެންޑް ގައުމީ ޓީމަށް މިދިޔަ އަހަރުގެ ޔޫރޯ ފުޓްބޯޅަ މުބާރާތުގައި ކުޅުނު ކައުކޯ، 31، ވަނީ އެ މުބާރާތަށް ފަހު ޑެންމާކްގެ އެސްބިއާ ދޫކޮށް މޯހަން ބަގާން އަށް ސޮއިކޮށްފަ އެވެ. މިދިޔަ އަހަރުގެ އޮގަސްޓް މަހު މާލޭގައި ސެންޓްރަލައިޒްކޮށް ހޯސްޓްކުރި އޭއެފްސީ ކަޕްގެ ދެކުނު އޭޝިއާގެ ގްރޫޕްގެ މެޗުތަކުގައި ކައުކޯ ނުކުޅެ އެވެ. އެކަމަކު، އޭޓީކޭ މޯހަން ބަގާން އިން މިދިޔަ އަހަރު ސެޕްޓެމްބަރު މަހު، އިންޓަ ޒޯން ޕްލޭއޮފް ސެމީ ފައިނަލުގައި އުޒްބެކިސްތާންގެ ނަސާފްއާ ދެކޮޅަށް ކުޅެ 6-0 އިން ބަލިވި މެޗުގައި ކައުކޯ ކުޅުނެވެ.

އޭޓީކޭ މޯހަން ބަގާން ފުރަތަމަ މެޗުން ވަނީ އައި ލީގުގެ ޗެމްޕިއަން، ގޯކުލަމް ކެރަލާ އަތުން 4-2 އިން ބަލިވެފަ އެވެ. އެކަމަަކު، އޭޓީކޭ މޯހަން ބަގާނުން ވަނީ ދެން ކުޅުނު ދެ މެޗުގައި ބަންގްލަދޭޝްގެ ޗެމްޕިއަން ބަޝުންދަރާ ކިންގްސް އާއި ރާއްޖޭގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށްފަ އެވެ. ބަޝުންދަރާ އަތުން 4-0 އިން މޮޅުވިއިރު، މާޒިޔާގެ މައްޗަށް ކުރިހޯދީ 5-2 އިންނެވެ. މާޒިޔާ އަތުން މޮޅުވި މެޗުގައި ކައުކޯ ދެ ގޯލު ޖެހިއިރު، މެޗުގެ މޮޅު ކުޅުންތެރިއަކީ ވެސް އޭނާ އެވެ.