އިންޑިޔާގެ ކަލްކަތާގެ ސޯލްޓް ލޭކް މި ސްޓޭޑިއަމަކީ މުޅި ދެކުނު އޭޝިއާއަށްވެސް މަޝްހޫރު، ބޮޑު އެހާމެ ހިތްގައިމު ސްޓޭޑިއަމެކެވެ. ވިވެކަނަންޑާ ޔޫބާ ބަރާތީ ކްރީރަންގަންގެ ނަމުން ނަންދެވިފައިވާ މި ސްޓޭޑިއަމަކީ ކުރިން އެއް ލައްކަ ވިހި ހާސް މީހުންނަށް ކުޅި ބަލަން ވަދެވޭ ގޮތަށް ހަދާފައިވާ ސްޓޭޑިއަމެކެވެ. އެހެންނަމަވެސް ފަހުން ދަނޑު މަރާމާތުކޮށް، ސްޓޭޑިއަމްގައި ސީޓް ޖެހުމަށް ފަހު މިހާރު ދަނޑުގެ ކެޕޭސިޓީއަކީ ރަސްމީކޮށް އަށްޑިހަ ހާހެވެ. ނަވާރަ ސަތޭކަ އަށްޑިހަ ނުވަވަނަ އަހަރާ ހަމައަށް ސޯލްޓް ލޭކް ސްޓޭޑިއަމްއަކީ ދުނިޔޭގެ އެންމެ ބޮޑު ސްޓޭޑިއަމްއެވެ.
ކަލްކަތާގެ އެންމެ ބޮޑު އަދި އެންމެ މަޝްހޫރު ދެ ކްލަބުކަމަށްވާ، މޯހަން ބަގާންއާއި އީސްޓް ބެންގޯލްގެ ހޯމް ސްޓޭޑިއަމްގެ ގޮތުގައި ކަނޑައަޅާފައިވާ މި ސްޓޭޑިއަމްގައި މި ދެ ޓީމު ނަވާރަ ސަތޭކަ ނުވަދިހަ ތިންވަނަ އަހަރު ކުޅުން މެޗު ބެލުމަށް އެއް ލައްކަ އެއްތިރީސް ހާސް ހަތް ސަތޭކަ އަށްޑިހަ މީހުން ވަތް ކަމަށް ރިކޯޑްތަކުން ދައްކައެވެ. މިއީ ދުނިޔޭގެ ރެކޯޑެކެވެ.
އެންމެ މަތީ ފެންވަރަށް ހަދާފައިވާ މި ސްޓޭޑިއަމްގެ ވިނަގަނޑު ދެހާސް ސަތާރަވަނަ އަހަރު އޮތް ސަތާރަ އަހަރުން ދަށުގެ ވޯލްޑްކަޕަށްވަނީ ނެޗުރަލް ގްރާސް އަށް ބަދަލުކޮށްފައެވެ. ނަވާރަ ސަތޭކަ އަށްޑިހަ ހަތަރުވަނަ އަހަރު ހެދި މި ސްޓޭޑިއަމް، ދެހާސް ފަނަރަވަނަ އަހަރު އަލުން މަރާމާތު ކުރުމަށް ގާތްގަނޑަކަށް ތޭރަ މިލިއަން ޑޮލަރު ހަރަރުކޮށްފައިވެއެވެ.
ސޯލްޓްލޭކް ސްޓޭޑިއަމްގައި ކުޅެފައިވާ މަޝްހޫރު މެޗުތަކުގެ ތެރޭގައި ދެހާސް އެގާރަވަނަ އަހަރު އާޖެންޓީނާއާ ވެނެޒިއުލާ ކުޅުނު ފްރެންޑްލީ މެޗު ފާހަގަކޮށްލެވެއެވެ. މި މެޗުގައި މެސީވެސް ކުޅުނެވެ. މީގެ އިތުރުން ބަޔާން މިއުނިކްގެ މަޝްހޫރު ތަރި އޮލިވަރޚާން ކުޅުން ހުއްޓާލުމުގެ ގޮތުން ކުޅުނު އެކުވެރިކަމުގެ މެޗުވެސް ކުޅުނީ ސޯލްޓް ލޭކް ސްޓޭޑިއަމްގައެވެ.